Klabu ya Chelsea imethibitisha kukamilisha usajili wa winga chipukizi wa Kimataifa wa Argentina, Alejandro Garnacho, akitokea Manchester United kwa ada ya uhamisho ya Euro milioni 46.
Garnacho mwenye umri wa miaka 21, amesaini mkataba wa miaka 7 utakaomuweka Stamford Bridge hadi mwezi Juni mwaka 2032.
Nyota huyo kijana ambaye ameibukia kwenye kiwango cha juu akiwa Old Trafford, amekuwa mmoja wa wachezaji waliokuwa wakipendwa na mashabiki wa Manchester United kutokana na kasi yake, ujasiri wa kumiliki mpira na uwezo wa kufunga mabao muhimu katika mechi kubwa.
Kwa kukamilika kwa dili hili, Chelsea wanaendeleza sera yao ya kusajili wachezaji vijana wenye vipaji ili kuunda kikosi cha muda mrefu kitakachoshindana ndani na nje ya Uingereza. Garnacho ataungana na safu ya washambuliaji akina Mykhailo Mudryk, Noni Madueke na Cole Palmer, jambo linalotazamiwa kuongeza nguvu na ushindani mkubwa kwenye kikosi cha kocha mkuu wa The Blues.
Ujio wa Garnacho pia unaibua taswira mpya kwenye historia ya soka ya England, kwani si jambo la kawaida kwa Chelsea na Manchester United kufanya biashara kubwa ya moja kwa moja ya usajili wa nyota kijana mwenye hadhi hiyo.
Mashabiki wa Chelsea wanamkaribisha Garnacho kwa shauku kubwa, wakiamini atakuwa nguzo muhimu ya mafanikio ya klabu hiyo kwa misimu ijayo.